జూనియర్‌ కాలేజీల ఏర్పాటుకు ద్వారాలు

రాష్ట్రంలో ప్రైవేటు అన్‌ఎయిడెడ్‌ జూనియర్‌ కాలేజీల ఏర్పాటుకు ప్రభుత్వం ద్వారాలు తెరిచింది. కొత్త జూనియర్‌ కాలేజీల ఏర్పాటుకు దరఖాస్తులను ఆహ్వానిస్తూ ఇంటర్‌ బోర్డు నుంచి నోటిఫికేషన్‌ లేకున్నప్పటికీ... విచక్షణాధికారంతో సర్కారు ఉదారంగా అనుమతులు ఇచ్చేస్తోంది. ఇంటర్‌ బోర్డుతో సంబంధం లేకుండా ఎడ్యుకేషన్‌ సొసైటీ పేరిట నేరుగా విద్యాశాఖమంత్రికి వినతి పత్రం సమర్పించుకుంటే చాలు.. కాలేజీ ఏర్పాటుకు అనుమతి ఇస్తూ ఉత్తర్వులు జారీచేసేస్తున్నారు. ఫీజిబిలిటీ లేనప్పటికీ , ఫైర్‌ సేఫ్టీ సర్టిఫికెట్‌ లేకున్నా నిబంధనలు సడలించి అడిగిందే తడవుగా అనుమతులు ఇచ్చేస్తున్నారు.

 

అధికార పార్టీకి చెందిన ప్రజాప్రతినిధుల సిఫారసులు, పైరవీలే ప్రాతిపదికగా అనుమతులు ఇస్తుండటంపై విమర్శలు వస్తున్నాయి. ఉమ్మడి రాష్ట్రంలో కొత్తగా ప్రైవేట్‌ అన్‌ఎయిడెడ్‌ జూనియర్‌ కాలేజీల ఏర్పాటుకు చివరిసారిగా 2013-14 విద్యా సంవత్సరంలో ఇంటర్‌ బోర్డు నోటిఫికేషన్‌ విడుదల చేసింది. ఆ తర్వాత(గత ఏడేళ్లుగా) ఏపీ ప్రభుత్వం నోటిఫికేషన్‌ ఇవ్వలేదు. దీంతో కొత్త కాలేజీ ఏర్పాటుకు నిబంధనల ప్రకారం సాధ్యం కాదు. కానీ పలుకుబడి ఉన్న వారు, ప్రజాప్రతినిధులు మాత్రం.. సర్కారు విచక్షణాధికారంతో కాలేజీలను తెచ్చుకోవడం పరిపాటిగా మారింది. ఈ ఏడాది జూన్‌లో అధికారం చేపట్టిన కొత్త ప్రభుత్వం గత 100 రోజుల్లో 10 కొత్త ప్రైవేట్‌ అన్‌ఎయిడెడ్‌ జూనియర్‌ కాలేజీల ఏర్పాటుకు(జూన్‌లో 4, జూలైలో ఒకటి, సెప్టెంబరులో 5) అనుమతి ఇస్తూ విద్యాశాఖ ఉత్తర్వులు జారీచేసింది. వీటిలో విశాఖపట్నం జిల్లాలో ఐదు, విజయనగరం, కడప, తూర్పుగోదావరి, ప్రకాశం, నెల్లూరు జిల్లాల్లో ఒక్కొక్కటి ఉన్నాయి. మరో 25 కొత్త కాలేజీల కోసం ఎడ్యుకేషన్‌ సొసైటీలు ఇచ్చిన దరఖాస్తులు ప్రభుత్వ పరిశీలనలో ఉన్నాయి. ఆ ఫైళ్లూ ఇంటర్‌బోర్డు నుంచి లాంఛనాలు పూర్తిచేసుకొని తాజాగా సచివాలయానికి చేరుకున్నాయి. వీటికీ దశల వారీగా అనుమతులు లభించబోతున్నాయని సమాచారం.