తాజా వార్తలు
టీడీపీ నుంచి వల్లభనేని వంశీ సస్పెన్షన్
Friday November 15, 2019

టీడీపీపై వివాదాస్పద వ్యాఖ్యలు చేసిన గన్నవరం ఎమ్మెల్యే వల్లభనేని వంశీ విషయంలో పార్టీ అధిష్టానం కీలక నిర్ణయం తీసుకుంది. వంశీపై సస్పెన్షన్ వేటు పడింది. టీడీపీ నుంచి వల్లభనేని వంశీని సస్పెండ్ చేస్తున్నట్లు అధిష్టానం ప్రకటించింది. శుక్రవారం ఉదయం పార్టీ సీనియర్ నేతలతో అధినేత చంద్రబాబు సమావేశమయ్యారు. ఈ సమావేశంలో వంశీ వ్యవహారం చర్చకొచ్చినట్లు తెలిసింది. వంశీ ఉద్దేశపూర్వకంగానే వ్యాఖ్యలు చేశాడని.. వైసీపీలోకి వెళ్లేందుకే పార్టీపై దుమ్మెత్తిపోశాడని మెజార్టీ నేతలు చంద్రబాబుకు వివరించారు. దీంతో... పార్టీపై ఉద్దేశపూర్వకంగా ఎవరు ఈ తరహా వ్యాఖ్యలు చేసినా ఉపేక్షించేది లేదని చంద్రబాబు స్పష్టం చేసినట్లు సమాచారం. వంశీ వ్యాఖ్యలను తీవ్రంగా పరిగణించిన చంద్రబాబు వంశీని పార్టీ నుంచి తొలగిస్తున్నట్లు పార్టీ నేతలకు తేల్చి చెప్పినట్లు తెలిసింది.   వల్లభనేని వంశీ వైసీపీలో చేరికకు ఈ పరిణామంతో మార్గం సుగమమైందని చెప్పవచ్చు. రాజీనామా చేసిన సందర్భంలో రాజకీయాల నుంచి తప్పుకుంటున్నట్లు ప్రకటించిన వంశీ కొన్ని రోజులకే మాట మార్చారు. జగన్‌‌తో కలిసి నడవాలని నిర్ణయించుకున్నట్లు గురువారం ప్రెస్‌మీట్ పెట్టి మరీ కుండబద్ధలు కొట్టారు. అంతేకాదు, టీడీపీపై.. పార్టీ అధినేత చంద్రబాబుపై, లోకేష్‌పై కూడా తీవ్ర స్థాయిలో విమర్శలు చేశారు. చంద్రబాబు ప్రతిపక్ష నాయకుడి పాత్రను కూడా సమర్థంగా పోషించలేకపోతున్నారని అన్నారు.     45 సంవత్సరాల రాజకీయ అనుభవమున్న చంద్రబాబు... అధికారం లేకపోతే ఐదారునెలలు కూడా ఆగలేకపోతున్నారని విమర్శించారు. ఇసుక కోసం దీక్షలు చేయటం సరికాదన్నారు. అకాల వర్షాలు, అతివృష్టి, వరదలు, ప్రకృతి విపత్తులు సంభవించినపుడు కూడా నదుల, కాలువల నుంచి ఇసుకను తీసే టెక్నాలజీని చంద్రబాబు ఏమైనా కనిపెట్టారా అని వంశీ ప్రశ్నించారు. ఏ ప్రభుత్వం వచ్చినా మంచి పనిచేస్తే సమర్థించాలని, అలాకాకుండా గుడ్డెద్దు చేలో పడ్డట్టు మీరు వ్యతిరేకించగానే, మీ వెనుక దూడల్లాగా అనుసరిస్తే అభాసుపాల అవుతామన్నారు. ఇంగ్లీషు మీడియంను సమర్థించారు. విద్యార్థులు, తల్లిదండ్రులు ఇంగ్లీషు వద్దని చెప్పటం లేదు కదా అన్నారు.

ఆ వెబ్‌సైట్లతో నాకు సంబంధం లేదు
Friday November 15, 2019

నెల్లూరు: గన్నవరం ఎమ్మెల్యే వల్లభనేని వంశీ చేసిన ఆరోపణలపై నారా లోకేష్ తీవ్రంగా స్పందించారు. టీడీపీపై వంశీ చేసిన వ్యాఖ్యలు సరికాదని హితవుపలికారు. వెబ్‌సైట్లలో తప్పుడు ప్రచారం చేస్తున్నారన్న వంశీ ఆరోపణలను లోకేష్ ఖండించారు. వంశీ చెబుతున్న వెబ్‌సైట్లతో తనకు సంబంధం లేదని తేల్చిచెప్పారు. 2009 నాటి జూ.ఎన్టీఆర్‌ విషయం ఇప్పుడెందుకు మాట్లాడుతున్నారని ప్రశ్నించారు. నిన్నటి వరకు జగన్‌ను తిట్టిన వంశీ ఇవాళ అదే పార్టీలోకి వెళ్లారన్నారు. వంశీ ఇవాళ ఒకటి, రేపు మరొకటి మాట్లాడుతారని వ్యాఖ్యానించారు. వంశీ హ్యాంగోవర్ నుంచి బయటకి వచ్చినట్టు లేరని ఎద్దేవా చేశారు. ఆస్తుల్ని కాపాడుకోవడం కోసం పార్టీ మారిన వారు చేసే.. ఆరోపణల్ని పట్టించుకోవాల్సిన అవసరం లేదని స్పష్టం చేశారు. భూ సమస్యల కారణంగా వంశీ పార్టీని వీడారని చెప్పారు.

మాట్లాడితే మూడు పెళ్లిళ్లు అంటారు మీరూ చేసుకోండి..
Wednesday November 13, 2019

‘నేను మూడు పెళ్లిళ్లు చేసుకున్న కారణంగానే మీరు రెండేళ్లు జైల్లో ఉన్నారా..? నా పెళ్లిళ్ల వల్లే విజయసాయిరెడ్డితో కలిసి జైల్లో కూర్చున్నారా’ అని సీఎం జగన్‌పై జనసేన అధ్యక్షుడు పవన్‌ కల్యాణ్‌ విరుచుకుపడ్డారు. పార్టీల పాలసీలు, విధివిధానాలపై తాను మా ట్లాడుతుంటే వ్యక్తిగత ఆరోపణలకు దిగడమేంటని నిలదీశారు. తనను కాపు నేతలతో తిట్టించడాన్ని తప్పుబట్టారు. తనపై జగన్‌, వైసీపీ నేతలు చేసిన వ్యక్తిగత ఆరోపణలకు ఆయన మంగళవారం విజయవాడలో ఘాటుగా బదులిచ్చారు. ‘మాట్లాడితే 3 పెళ్లిళ్లు అంటారు. మీరూ చేసుకోండి.. ఎవరు కాదన్నారు? మేం అడిగిన దానికి పద్ధతి ప్రకారం సమాధానం చెప్పండి. ఇసుక, రివర్స్‌ టెండర్‌ దగ్గర నుంచి ఏ పనినీ పద్ధతి ప్రకారం చేయడం లేదు. 151 మంది ఎమ్మెల్యేలు ఉన్నారని రెచ్చిపోయి మాట్లాడుతున్నారు. పాము శివుడి మెడలో ఉన్నప్పుడే గౌరవిస్తాం. ఒక్కసారి జగన్‌ రెడ్డి పరిస్థితి అటూఇటైతే మీ పరిస్థితేంటో ఆలోచించుకోండి. ఎలా పడితే అలా మాట్లాడితే భరించడానికి మాది టీడీపీ కాదు. ప్రస్తుతం జగన్‌ రెడ్డి విధానం చూస్తుంటే, థౌజండ్‌ వాలాను ఆయన తనకు, తన 151 మంది ఎమ్మెల్యేలకు చుట్టి అంటించుకున్నట్లుగా ఉంది. మొత్తం కాలిపోతారు జాగ్రత్త’ అని హెచ్చరించారు.   జనసేన అంటే జగన్‌ రెడ్డికి భయమని.. లేదంటే తనపై అంత ఘాటుగా స్పందించాల్సిన అవసరం లేదని పవన్‌ అన్నారు. ‘మేం బయటకు వస్తే లక్షన్నర మంది జనం రోడ్లపైకి వస్తారని నిరూపించాం. 151 మంది ఎమ్మెల్యేలు ఉన్న పార్టీ కేవలం ఒక్క ఎమ్మెల్యే ఉన్న పార్టీకి ఇంత ఘాటుగా స మాధానం చెబుతున్నారు. ఈ వ్యాఖ్యలతో మీలో లోపాలున్నాయని అర్థమవుతోంది. నిన్నటి సందర్భమేంటి? మీరేం మాట్లాడారు? అబ్దుల్ కలాం ఆజాద్‌ జయంతి వేడుకల్లో మాట్లాడాల్సిన విషయమేంటి’ అని నిలదీశారు. ‘వేరే విధంగా లబ్ధిపొందాలనే ఉద్దేశంతో ఇసుకను ఆపేశారు. 50 మంది కార్మికులు ఆత్మహత్యలు చేసుకున్నారని కార్మిక సంఘాల వాళ్లు చెబుతున్నారు. కేవలం ఐదు కుటుంబాలకు మాత్రమే ప్రభుత్వం ఎక్స్‌గ్రేషియో ఇచ్చింది. ఇసుక విధానం, తెలుగు భాష గురించి మేం పద్ధతిగా మాట్లాడాం. మేం వైసీపీ విధివిధానాలు, పాలసీలపై మాట్లాడితే.. వాళ్లు దానిపైనే విమర్శించాలి

ప్రధాన వార్తలు
ఫీజు రీయింబర్స్‌మెంట్‌కు ఇది అదనం: సీఎం
Friday November 15, 2019

ఇక నుంచి ఇంటర్మీడియట్‌పైన చదివే విద్యార్థులకు ఫీజు రీయింబర్స్‌మెంట్‌తో పాటు ఏడాదికి రూ.20 వేలు చెల్లిస్తామని ముఖ్యమంత్రి వైఎస్‌ జగన్మోహన్‌రెడ్డి ప్రకటించారు. ప్రతి లోక్‌సభ నియోజకవర్గంలో ఒక మానవ వనరుల అభివృద్ధి కేంద్రాన్ని ప్రారంభించనున్నట్లు తెలిపారు. అలాంటి 25 కేంద్రాలను అనుసంధానం చేస్తూ ప్రత్యేక యూనివర్సిటీని ఏర్పాటుచేస్తామని చెప్పారు. గురువారం ఒంగోలులో ‘మన బడి.. నాడు-నేడు’ కార్యక్రమాన్ని ఆయన ప్రారంభించారు. అనంతరం బహిరంగ సభలో ప్రసంగించారు. గత 5 నెలల్లో 4 లక్షల ఉద్యోగాలు ఇచ్చామని, భవిష్యత్‌లో ఏర్పాటు చేయబోయే పరిశ్రమల్లో 75 శాతం ఉద్యోగాలను స్థానికులకు ఇవ్వాలన్న చట్టం ఉన్నందున ఈ మానవ వనరుల అభివృద్ధి కేంద్రాలు అవసరమని చెప్పారు.   రాష్ట్రంలో ఇంటర్‌ పూర్తయిన తర్వాత కేవలం 24 శాతం మంది విద్యార్థులే చదువులు కొనసాగిస్తున్నారని, ఎక్కువ శాతం మంది చదవకపోవడానికి కారణం పేదరికమని తెలిపారు. ప్రతి పేద కుటుంబం నుంచి ఒక ఇంజనీరు లేక డాక్టర్‌ లేక కలెక్టర్‌ ఉండాలన్న లక్ష్యంతో ఉన్నత విద్యకు చేయూతనివ్వబోతున్నట్లు తెలిపారు. ఫీజు రీయింబర్స్‌మెంట్‌తోపాటు ప్రతి విద్యార్థికీ ఏడాదికి వసతి, భోజనానికి రూ.20 వేలు ఖర్చవుతుందని.. ఆ మొత్తాన్ని ప్రభుత్వం ఇస్తుందని చెప్పారు. సంక్షేమ, సబ్సిడీ పథకాలతో రాష్ట్రంలో ఆర్థిక సమస్యలు ఎదురైనా అధిగమిస్తామన్నారు. మంచి మనసుతో ముందడుగు వేస్తే పైన ఉన్న దేవుడు, ప్రజల దీవెనలు కాపాడతాయని చెప్పారు. సవాళ్లను అధిగమిస్తేనే ఫలితాలు లభిస్తాయని తెలిపారు. చరిత్రను మార్చే ‘నాడు-నేడు’ కార్యక్రమాన్ని ప్రారంభించామని.. ప్రభుత్వ పాఠశాలలు ఇప్పుడు ఎలా ఉన్నాయో.. ఏడాది తర్వాత ఎలా ఉన్నాయో ఫొటోలు తీసి చూపిస్తామన్నారు. పిల్లలను బడికి పంపితే ప్రతి తల్లికి రూ.15 వేలు ఇస్తామని తెలిపారు.

మహారాష్ట్రపై అమిత్‌షా బిగ్ స్టేట్‌మెంట్..
Wednesday November 13, 2019

మహారాష్ట్రలో రాష్ట్రపతి పాలన విధించిన తర్వాత తొలిసారిగా కేంద్ర హోం మంత్రి అమిత్‌షా స్పందించారు. గవర్నర్ అన్నిపార్టీలకు చాలా సమయం ఇచ్చారని, ఏ పార్టీ కూడా ప్రభుత్వం ఏర్పాటుకు ముందుకు రాలేదని ఏఎన్ఐ వార్తా సంస్థతో మాట్లాడుతూ చెప్పారు. గవర్నర్ 18 రోజుల పాటు అన్ని పార్టీలకు సమయం ఇచ్చారని చెప్పారు. ఏ రాష్ట్రానికి ఇన్ని రోజులు సమయం ఇచ్చిన దాఖలాలు లేవని ఆయన పేర్కొన్నారు. ప్రభుత్వం ఏర్పాటు చేయాలనుకుంటే ఇప్పటికీ ఆయా పార్టీలకు 6 నెలల గడవు ఉందని ఆయన చెప్పారు.     శివసేనతో పొత్తు దెబ్బతినడంపై అమిత్‌షా వివరణ ఇస్తూ, ఎన్నికలకు ముందే ప్రధాని మోదీ, తాను అనేకసార్లు బహిరంగ సభల్లో కూటమి విజయం సాధిస్తే దేవేంద్ర ఫడ్నవిస్ ముఖ్యమంత్రి అవుతారని ప్రకటించామని చెప్పారు. అప్పడు ఎవరూ అభ్యంతరం చెప్పలేదని, ఇప్పుడు కొత్త డిమాండ్లతో వారు (శివసేన) ముందుకు వచ్చారని చెప్పారు. ఆ డిమాండ్లు తమకు ఆమోదయోగ్యం కాదని చెప్పారు.

ఇసుక కొరతపై సీఎం జగన్ సంచలన నిర్ణయం..
Tuesday November 12, 2019

 ఆంధ్రప్రదేశ్‌లో నెలకొన్న ఇసుక కొరతపై సీఎం వైఎస్ జగన్ మోహన్‌రెడ్డి కీలక నిర్ణయం తీసుకున్నారు. మంగళవారం నాడు ఈ విషయమై అధికారులతో సమీక్ష నిర్వహించి జగన్.. నవంబర్‌ 14 నుంచి 21 వరకు ఇసుక వారోత్సవాలు జరపాలని ఆదేశించారు. ‘గతంలో సరాసరి ఇసుక డిమాండ్‌ 80వేల టన్నులు ఉండేది. వరదలతో రీచ్‌లు మునిగిన కారణంగా డిమాండ్‌ను చేరుకోలేకపోయాం. గత వారం రోజులుగా పరిస్థితి మెరుగుపడింది. రీచ్‌ల సంఖ్య సుమారు 60 నుంచి 90కి చేరింది. 137 నుంచి 180 వరకూ స్టాక్‌ పాయింట్లు పెంచాలి. నియోజకవర్గాల వారీగా రేటు కార్డును ప్రకటించాలి. ఎల్లుండిలోగా రేటు కార్డును నిర్ణయించాలి. ఇసుక ఎక్కువ ధరకు అమ్మితే రెండేళ్ల వరకు జైలుశిక్ష. ఇసుక కొరత తీరే వరకూ సిబ్బంది సెలవులు తీసుకోవద్దు. సరిహద్దుల్లోని అన్ని రూట్లలో చెక్‌పోస్టులు పెట్టాలి. 10 రోజుల్లోగా చెక్‌పోస్టులు, సీసీ కెమెరాలు ఏర్పాటు చేయాలి’ అని అధికారులను జగన్ ఆదేశించారు.   కాగా.. ఏపీలో ఇసుక కొరతతో భవన కార్మికులు ఆత్మహత్యలు చేసుకుంటున్నారని ఇప్పటికే ప్రతిపక్షాలు ఆందోళనలు, నిరసనలు చేపట్టాయి. మరోవైపు జనసేన అధినేత పవన్ కల్యాణ్ విశాలో లాంగ్ మార్చ్ కూడా తలపెట్టారు. అంతేకాదు ఈ వ్యవహారంపై నవంబర్-14న టీడీపీ అధినేత చంద్రబాబు దీక్ష చేపట్టనున్నారు.

బిజినెస్
ఫోన్‌ చెడిందా.. కంగారొద్దు
Saturday January 12, 2019

మా దగ్గర మీరు కొన్న ఫోన్‌ చెడిపోతే మీరు మా దగ్గరకు రావాల్సిన అవసరం లేదు. సమాచారం ఇస్తే మేమే మీ ఇంటికి వచ్చి ఫోన్‌ను పరిశీలిస్తాం... అది రిపేర్‌ కావడానికి సమయం పడితే రిపేర్‌ అయ్యేవరకు ఒక ఫోన్‌ వాడుకోవడానికి ఇస్తామంటూ చిన్న సెల్‌షాపులు, షోరూంలు ఈ వారం నుంచి ప్రచారం ప్రారంభించాయి.     సెల్‌ చెడిపోతే అప్పటివరకు ఫోన్ సేవలకు అవాంతరం అవుతుందని, అందువలన వినియోగదారులకు అంతరాయాలు లేకుండా ఈ సదుపాయం కల్పిస్తున్నట్లు అభిప్రాయ పడుతున్నారు. అయితే పెద్ద షోరూంలలో ఈ సదుపాయం లేదు. చిన్న షాపుల వారు మాత్రమే ఈ ఆఫర్లు పెట్టారు. పెద్ద షో రూంలలో ధరల తగ్గింపు ప్రభా వాన్ని తట్టు కోవడానికే ఈ ఆఫర్లు ప్రకటించారు. దీంతో వినియోగ దారులతో నేరుగా సంబంధాలు ఏర్పర్చుకొని వారిని సంతృప్తిని పరచడం ద్వారా వ్యాపార విస్తృతి కోసం దీనిని ప్రకటిస్తున్నారు.

పతనమవుతున్న బెల్లం ధరలు
Wednesday December 12, 2018

అనకాపల్లి: ఎన్టీఆర్‌ మార్కెట్‌ యార్డులో బెల్లం ధరలు రోజు రోజుకి పతనమవుతుండడంతో రైతులు ఆందోళన చెందుతున్నారు. 8వ తేదీన ఒకటోరకం వంద కిలోలు రూ.3110 పలకగా మధ్యరకం రూ. 2770లకు పలికింది. నల్లబెల్లం రూ.2520లకు పలికాయి. 10న ఒకటోరకం రూ.3060, మధ్యరకం రూ.2740, నల్లబెల్లం రూ. 2490లకు పడిపోయింది. మంగళవారం ఒకటో రకం రూ.3000లకు పడిపోగా మధ్యరకం రూ. 2710కి తగ్గిపోయింది. నల్లబెల్లం రూ.2530కి పెరిగింది. వాస్తవానికి ఒకటో రకం బెల్లం దిమ్మలు తక్కువగా వస్తుంటాయి. దాని తరువాత రకాన్నే ప్రమాణికంగా తీసుకోవాలి. ఆతరువాత రకమైతే రూ.2860లకు పలికినట్టు వర్తకులు చెబుతున్నారు. ఇతర మార్కెట్‌ల్లో ధరలు తక్కువగా ఉండడంతో వాటి ప్రభావం అనకాపల్లి మార్కెట్‌పై కూడా పడుతుందని వర్తకులు చెప్పారు.   అలాగే మహారాష్ట్ర, కర్ణాటక బెల్లాలు ఇతర రాష్ట్ర వర్తకులకు రవాణాతో సహా కలుపుకొని తక్కువ రేటుకు అమ్మకాలు చేయడంతో అనకాపల్లి మార్కెట్‌కు ఆర్డర్లు తగ్గుతున్నాయని వర్తకులు తెలిపారు. సంక్రాంతి పండుగ సమయంలో బెల్లం ధరలు పడిపోతుండడంతో రైతులు తీవ్ర ఆందోళన చెందుతున్నారు. మూడేళ్లుగా చెరకు పంటకు తెగుళ్లు సోకి ఆర్థికంగా నష్టపోతున్న సమయంలోనైనా రాష్ట్ర ప్రభుత్వం చెరకు రైతులను ఆదుకుంటే బాగుంటుందని పలువురు అంటున్నారు. రాష్ట్ర ప్రభు త్వం క్రిస్మస్‌, సంక్రాంతి పండుగల పర్వదినం సందర్భంగా ఇచ్చే చంద్రన్న కానుకకు అనకాపల్లి బెల్లా న్ని కొనుగోలు చేసి ఉంటే రైతులకు కొంతైనా గిట్టుబాటు ధర లభించేదని చెరకు రైతు సంఘం జిల్లా కార్యదర్శి కర్రి అప్పారావు తెలిపారు.

ఆటో మొబైల్ రంగంలో ఏపీ మరో ముందడుగు
Thursday December 06, 2018

అమరావతి: ఆటో మొబైల్ రంగంలో ఆంధ్రప్రదేశ్ మరో ముందడుగు వేయనుంది. ఈరోజు ముఖ్యమంత్రి చంద్రబాబు సమక్షంలో కియా మోటార్స్‌తో ఎంవోయూ కుదుర్చుకోనున్నారు. ప్రతి ఏటా 3 లక్షల కార్లను కియా మోటార్స్‌ తయారు చేయనుంది. ఏపీలో ప్లాంట్ నిర్మాణానికి 1.6 బిలియన్‌ అమెరికన్‌ డాలర్ల పెట్టుబడి పెట్టేందుకు కియా కంపెనీ సిద్ధమైంది. కియో మోటార్స్ ద్వారా ప్రత్యక్షంగా, పరోక్షంగా 11 వేల మందికి ఉపాధి అవకాశాలు లభించనున్నాయి. వచ్చే ఏడాది ఆరంభంలోనే కార్లను రోడ్డుపైకి తెచ్చేలా కియా ప్రణాళిక సిద్ధం చేసుకుంది.

రాజకీయాలు
వైసీపీలోకి తెలుగు యువత రాష్ట్ర అధ్యక్షుడు దేవినేని అవినాశ్‌
Friday November 15, 2019

తెలుగు యువత రాష్ట్ర అధ్యక్షుడు దేవినేని అవినాశ్‌ తన పదవికి, టీడీపీ సభ్యతానికి రాజీనామా చేశారు. ఆయనతోపాటు టీడీపీ సీనియర్‌ నేత కడియాల బుచ్చిబాబు కూడా రాజీనామా సమర్పించారు. వీరిద్దరూ తమ రాజీనామా లేఖలను గురువారం ఉదయం టీడీపీ రాష్ట్ర కార్యాలయానికి పంపించారు. సాయంత్రం ముఖ్యమంత్రి వైఎస్‌ జగన్మోహన్‌రెడ్డి సమక్షంలో వైసీపీలో చేరారు. ముఖ్యమంత్రి జగన్‌.. దేవినేని అవినాశ్‌, కడియాల బుచ్చిబాబులకు వైసీపీ కండువాలు కప్పి పార్టీలోకి ఆహ్వానించారు. ఈ సందర్భంగా అవినాశ్‌ మాట్లాడారు. ముఖ్యమంత్రి వైఎస్‌ జగన్మోహన్‌రెడ్డి అమలు చేస్తున్న సంక్షేమ కార్యక్రమాలు నచ్చి వైసీపీలో చేరానన్నారు. కాగా, టీడీపీ అధినేత చంద్రబాబుకు అవినాశ్‌ సుదీర్ఘమైన లేఖ రాశారు. తాను పార్టీని వీడుతున్నాయంటూ ప్రధాన మీడియాలోనూ, సోషల్‌ మీడియాలోనూ వార్తలు హల్‌చల్‌ చేయడం వెనుక స్థానిక నేతలు ఉన్నారని ఆరోపించారు. వారిపై ఫిర్యాదు చేసినా ఎలాంటి చర్యలూ లేకపోగా, వారికే ప్రాధాన్యం లభించడంపై అసంతృప్తి వ్యక్తం చేశారు. టీడీపీ తనను, తమ అనుచరగణాన్ని ఉపయోగించుకోవడంలో విఫలమైందని స్పష్టం చేశారు. అనువుకాదని తెలిసినా గుడివాడలో అధినేత మాటను జవదాటకుండా పోటీ చేసిన విషయాన్ని ప్రస్తావించారు. సార్వత్రిక ఎన్నికల్లో గుడివాడ టీడీపీ అభ్యర్థిగా పోటీ చేసిన దేవినేని అవినాశ్‌ వైసీపీ తీర్థం పుచ్చుకోవడంపై టీడీపీ శ్రేణులు మండిపడుతున్నాయి. ఆదినుంచి పార్టీకి సంస్థాగతంగా పట్టు ఉన్న గుడివాడ నియోజకవర్గానికి అవినాశ్‌ అతిఽథిగా వచ్చి వెళ్లిపోయాడనీ, ఆయన పార్టీని వీడినా వచ్చిన నష్టమేమీ లేదని స్పష్టం చేస్తున్నారు.

దీక్ష చేస్తున్నట్లు ప్రకటించిన తర్వాతే
Tuesday November 12, 2019

 ఆంధ్రప్రదేశ్‌లో ఇసుక కొరతను నిరసిస్తూ టీడీపీ అధినేత చంద్రబాబు నాయుడు దీక్ష చేపడుతున్నట్లు ప్రకటించిన విషయం విదితమే. ఎల్లుండి అనగా నవంబర్-14న విజయవాడలో 12గంటలపాటు బాబు దీక్షకు దిగుతున్నారు. కాగా ఈ దీక్ష విషయమై చంద్రబాబు తాజాగా మాట్లాడుతూ ఆసక్తికర వ్యాఖ్యలు చేశారు. విజయవాడ దీక్ష ప్రకటన చేశాక ఇసుక అందుబాటు స్వల్పంగా పెంచారని వ్యాఖ్యానించారు. అంతేకాదు.. 14నుంచి ఇసుక వారోత్సవాల ప్రకటన అందులో భాగమేనన్నారు. ఇసుక కొరత అనేది గతంలో ఏపీ చరిత్రలోనే లేదని.. ఆహార కొరత, విద్యుత్ కొరత, గ్యాస్ కొరత, నీటి కొరత విన్నాం కానీ, ఇసుక కొరత ఇప్పుడే చూస్తున్నామన్నారు. లేని ఇసుక కొరత సమస్యను వైసీపీ నేతలే సృష్టించారని బాబు విమర్శలు గుప్పించారు. నేతల అక్రమార్జనలకు ఇసుకను ఆదాయ వనరుగా చేశారన్నారు. మంగళవారం నాడు కృష్ణా, గుంటూరు జిల్లాల టీడీపీ నేతలతో బాబు టెలికాన్ఫరెన్స్ నిర్వహించారు.      ‘ఎరువులు, పురుగు మందుల బ్లాక్ మార్కెటింగ్ గురించి గతంలో విన్నాం. ఇసుక బ్లాక్ మార్కెటింగ్ గురించి ఇప్పుడే చూస్తున్నాం. 5రెట్ల అధిక ధరలకు ఇసుక విక్రయాలు చేస్తున్నారు. తీయాల్సిన దానికన్నా 5రెట్లు తక్కువ తీస్తున్నారు. కృత్రిమ కొరతను, బ్లాక్‌లో విక్రయాలను ప్రోత్సహించారు. వైసీపీ నేతలే చెన్నై, బెంగళూరు, హైదరాబాద్‌కు ఇసుక అక్రమ రవాణా. లారీ ఇసుక రూ.80వేల నుంచి రూ.లక్షకు అమ్మడం చరిత్రలో ఉందా...?. వైసీపీ ప్రభుత్వ వైఫల్యాలపై టీడీపీ రాజీలేని పోరాటం. భవన నిర్మాణ కార్మికులకు అండగా టీడీపీ ఉంటుంది. వైసీపీ ప్రభుత్వ వైఫల్యాలపై టీడీపీ పోరాట కమిటీ ఏర్పాటు చేశాం’ అని చంద్రబాబు ఈ సందర్భంగా కాన్ఫరెన్స్‌లో తెలిపారు.

ఇసుక వారోత్సవాలపై చంద్రబాబు ధ్వజం
Wednesday October 30, 2019

ఇసుకపై సీఎం జగన్ చేసిన వ్యాఖ్యలపై టీడీపీ అధినేత చంద్రబాబు తీవ్రస్థాయిలో ధ్వజమెత్తారు. రాష్ట్రంలో ఇసుక వారోత్సవాలు కాదు.. ఇసుకాసురుల భరతం పట్టే వారోత్సవాలు జరపాలన్నారు. పార్టీ శ్రేణులతో ఆయన టెలికాన్ఫరెన్స్‌లో మాట్లాడుతూ ప్రభుత్వంపై మండిపడ్డారు. ఇసుక వారోత్సవాలు నిర్వహిస్తామనడం సిగ్గుచేటు అన్నారు. గతంలో నరకాసురుడు, రావణాసురుడు, బకాసురుడు ఉన్నారని... ఇప్పుడైతే ఊరికో వైసీపీ ఇసుకాసురులు తయారయ్యారని ఆగ్రహం వ్యక్తం చేశారు. నరకాసురుడి అంతంతోనే దీపావళి వచ్చిందని.. ఇక ఇసుకాసురుల భరతం పడితేనే పేదలకు దీపావళి వస్తుందని చెప్పారు. ‘ఆత్మహత్యలకు ప్రేరేపించే పాలసీలు తెస్తారా..?, ఇసుక వారోత్సవాలు అనడానికి సిగ్గుండాలి. ఒక పక్క ఆత్మహత్యలు చేసుకుంటుంటే.. ‘నీకు మాత్రం వారోత్సవాలా’..?, ఇసుకపై, మట్టిపై నీ పెత్తనం ఏమిటి..?, సొంత పొలంలో ఉండే మట్టి తీసుకెళ్లడానికి నీ అనుమతి కావాలా..?, సొంత ఊళ్లో వాగు ఇసుక తీసుకెళ్లడానికి నీ అనుమతి కావాలా..? అంటూ’ ముఖ్యమంత్రిపై తీవ్ర ఆగ్రహం వ్యక్తం చేశారు.   అయినా తెలంగాణలో లేని ఇసుక కొరత ఏపీలోనే ఎందుకొచ్చింది..? , దేశంలో ఎక్కడా లేని ఇసుక కొరత సృష్టించారని ధ్వజమెత్తారు. రాష్ట్రంలో తక్షణమే ఇసుకపై సాధారణ పరిస్థితులు నెలకొల్పాలని డిమాండ్ చేశారు. ఇసుక నియంత్రణ పేరుతో వైసీపీ నేతల జేబులు నింపుతున్నారని ఆరోపించారు. ఇసుక స్మగ్లర్లు కోట్ల రూపాయలు దండుకుంటున్నారన్నారు. మీ తీరు వల్ల నిరుపేదలు ఆత్మహత్యలు చేసుకుంటున్నారని విమర్శించారు.     ‘కూలీలకు అండగా ఉండేవాళ్లను.. రాబందుల్లా రాళ్లేస్తున్నారని అంటారా..?, రాబందులు మేము కాదు, రాక్షసుల్లా మీరే వ్యవహరిస్తున్నారని’ విమర్శించారు. మంగళవారం పిడుగురాళ్లలో ట్రక్కు డ్రైవర్ గోపి ఆత్మహత్య చేసుకున్నాడని తెలిపారు. ఇసుక కొరత వల్ల ఆరుగురు ఆత్మహత్యలకు పాల్పడ్డారని గుర్తుచేశారు. ఇవన్నీ వైసీపీ ప్రభుత్వ హత్యలేనన్నారు. ఆత్మహత్యలపై మానవ హక్కుల కమిషన్‌కు ఫిర్యాదు చేయాలని పార్టీ నేతలకు సూచించారు. దీనిపై జాతీయ స్థాయిలో కూడా ఎండగట్టాలని పిలుపునిచ్చారు. ఆత్మహత్యలకు పాల్పడ్డ ఆరు కుటుంబాలను పార్టీ తరఫున ఆదుకోవాలని స్పష్టం చేశారు. మానవ హక్కుల కమిషన్ ఎదుటే వైసీపీ నేతల దౌర్జన్యాలు బైటపడ్డాయన్నారు. ‘పొనుగుపాడు గోడ చూడటానికి వచ్చినవాళ్ల ఎదుటే దౌర్జన్యాలా..? , ఒక వైపు మానవ హక్కుల కమిషన్ రాష్ట్రంలో పర్యటిస్తుంటే.. మరోవైపు అనంతపురం జిల్లా వెంకటాపురంలో గోడలు కడతరా?

మంచిమాట
నేటి మంచి మాట .....
Friday June 08, 2018

*సలహా అనేది ఎవరికి అత్యవసరమో, వారికే రుచించదు. *  తనను తాను సంస్కరించుకున్న వ్యక్తి కె ఇతరులను సంస్కరించే అధికారం అందుతుంది.