ఆర్టీసీకి మున్సిపాల్టీ తరహాలో ప్రభుత్వమే జీతాలు చెల్లించే ఆలోచన

వేల కోట్ల రూపాయల అప్పుల్లో కూరుకుపోయి కష్టాలకు ఎదురీదుతున్న ఆర్టీసీని ప్రభుత్వం అన్ని విధాలా ఆదుకుంటుందని రవాణా, సమాచారశాఖల మంత్రి పేర్ని వెంకట్రామయ్య(నాని) అన్నా రు. రానున్న కొద్ది రోజుల్లోనే ప్రభుత్వం ఆర్టీసీని విలీనం చేసుకుంటుందని ఆయన తెలిపారు. అలాగే ఆర్టీసీ కార్మికుల సమ్మెకూడా ఉండకపోవచ్చని చెప్పారు. ఆర్‌ అండ్‌ బీ అతిథి గృహంలో ఆదివారం మీడియాతో మాట్లాడారు. మంత్రి పద వి చేపట్టి ఒక్కరోజే అయినా తన వద్ద ఉన్న సమాచారం, సీఎం జగన్మోహన్‌రెడ్డి ఆలోచన మేరకు ఆర్టీసీని ప్రభుత్వం కచ్చితంగా ఆదుకుంటుందన్నారు. ఆర్టీసీలో 53 నుంచి 54 వేలమంది ఉద్యోగులు, సిబ్బందికి వేతనాల రూపంలో నెలకు రూ.100 కోట్లు ఇవ్వాల్సి వస్తోందన్నారు. మున్సిపాలిటీ ఉద్యోగుల మాదిరిగా ఆర్టీసీ ఉద్యోగుల వేతనాలను ప్రభుత్వమే చెల్లించే ఆలోచన చేస్తున్నామని నాని చెప్పారు.

 

 

ఏపీలో 83 శాతం ఆక్యుపెన్సీ రేటు ఉందని.. ఈ విషయంలో దేశంలోనే తొలిస్థానంలో ఉన్నామని మంత్రి చెప్పారు. కాగా.. వైసీపీ పాలనలో రైతుల నుంచి బలవంతంగా భూసేకరణ, సమీకరణ ఉందడని మంత్రి చెప్పారు. భూమిని తీసుకోవాల్సి వస్తే రైతులకు వాస్తవ పరిస్థితిని వివరించి వారి ఆమోదంతోనే సేకరిస్తామన్నారు.

 

సమాచారశాఖ మంత్రిగా రాష్ట్రంలోని జర్నలిస్టులందరి బాగోగులు చూసుకోవడం తమ బాధ్యతని నాని అన్నారు. జర్నలిస్టుల పిల్లలకు పాఠశాల విద్యలో సగం రాయితీ ఇవ్వకుండా కొన్ని విద్యాసంస్థలు దాటవేత ధోరణిని అవలంబిస్తు న్న విషయం తన పరిశీలనకు వచ్చిందన్నారు. ఈ అంశంపై ప్రత్యేక ఉత్తర్వులు జారీచేసి పకడ్బందీగా అమలు జరిగేలా చూస్తామన్నారు. జర్నలిస్టులకు గృహాల కేటాయింపులోనూ పారదర్శకంగా వ్యవహరిస్తామన్నారు. వాస్తవాలను పరిశీలించి అద్దె గృహాల్లో ఉండేవారికి తొలుత గృహాలు కేటాయించేలా చర్యలు తీసుకుంటామని చెప్పారు.