ఇంటి వద్దకే పోస్టల్‌ బ్యాంక్‌ సేవలు!

Published: Sunday November 03, 2019

భారతీయ పోస్టల్‌శాఖ దేశ వ్యాప్తంగా ఇండియా పోస్ట్‌ పేమెంట్‌ బ్యాంక్‌ సేవలను అమలులోకి తెచ్చింది. బెంగళూరు జనరల్‌ పోస్ట్‌ ఆఫీస్‌ (జీపీఓ) చీఫ్‌ పోస్ట్‌మాస్టర్‌ కె.రాధా కృష్ణ ఈ మేరకు నగరంలో ఒక ప్రకటన విడుదల చేశారు. బ్యాంకు ఖాతా తెరిచేందుకు, నగదు డ్రా చేసేందుకు ఇకపై ఎక్కడికీ వెళ్ళాల్సిన అవసరం లేదు. పోస్టల్‌శాఖ ప్రారంభించిన ఈ ప్రత్యేక పోస్టల్‌ బ్యాంకు సేవలను వినియోగించుకోవచ్చు. ఈ ఖాతాలలో పొదుపు చేసిన మొత్తాలకు వందశాతం సురక్షిత ఉంటుందని రాధాకృష్ణ వెల్లడించారు. ఈ ఖాతాలన్నీ జీరో బ్యాలెన్స్‌ ఖాతాలుగా ఉంటాయన్నారు. పోస్టల్‌ సిబ్బందికి ఆర్‌ఐసిటి డివైజ్‌ యంత్రాలను ఇవ్వడం జరుగుతుందని వీటి ద్వారా పోస్టల్‌ శాఖకు సంబంధించిన పొదుపు ఖాతాలను, రికరింగ్‌ డిపాజిట్‌లను చేసుకోవచ్చునన్నారు. పోస్టల్‌ సిబ్బందికి ఒక మొబైల్‌ కూడా ఇస్తున్నామని సంతకం ద్వారా ఖాతా వివరాలను అత్యంత సులభంగా నిర్వహించే వెసలుబాటు కల్పిస్తున్నామన్నారు. బెంగళూరు ఎంపీలు డి.వి.సదానందగౌడ, తేజస్వి సూర్య, పి.సి.మో హన్‌లు ఇప్పటికే పోస్టల్‌బ్యాంకు ఖాతాలు ప్రారంభించారన్నారు. ఈ పథకంపై ప్రజలలో విస్తారంగా జాగృతి చేపట్టనున్నట్టు ఆయన వివరించారు.