టోక్యో హీరోలకు ఘన స్వాగతం భారీగా తరలివచ్చిన అభిమానులు

ఈ క్రమంలో ఫ్యాన్స్‌ భౌతిక దూరాన్ని పక్కనపెట్టడంతోపాటు మాస్క్‌లు ధరించడమూ మరిచిపోయారు. ఉత్సాహం ఇనుమడించిన కొందరు అభిమానులు ఎయిర్‌పోర్టు బయట పుషప్స్‌ చేయడం కనిపించింది. ఎయిర్‌పోర్టు లోపల పలువురు ఫ్యాన్స్‌ నీరజ్‌ చోప్రా సహా ఇతర పతక విజేతలతో సెల్ఫీ దిగేందుకు పోటీపడ్డారు. పురుషులు, మహిళల హాకీ జట్లను చూడగానే పెద్దపెట్టున నినాదాలు చేశారు. ‘మా హీరోలను స్వాగతించేందుకు ఇక్కడకు వచ్చాం. వారిని చూసి ఎంతో గర్వపడుతున్నాం’ అని యువ మహిళా అథ్లెట్‌ ఒకరు చెప్పారు.  ఎస్‌యూవీ పైభాగాన్ని తెరిచి కాంస్య పతక రెజ్లర్‌ బజ్‌రంగ్‌ పూనియా ఫ్యాన్స్‌కు చేతులు ఊపగా.. ఒక్కసారిగా దూసుకొచ్చిన వారు అతడి వాహనం వెంట పరుగులు తీశారు. ‘వచ్చేసారి మేం ఇంకా మంచి ప్రదర్శన చేస్తాం. పోటీల సమయంలో నాకు మోకాలి గాయం సమస్య ఎదురైంది’ అని పసిడి పతక ఫేవరెట్‌గా దిగిన బజ్‌రంగ్‌ చెప్పాడు. ఇక ఎయిర్‌పోర్టు లోపల.. విమానాశ్రయ అధికారులు, సిబ్బంది పూలమాలలు వేసి, బొకేలు ఇచ్చి అథ్లెట్లను సాదరంగా స్వాగతించారు. ‘ఇంత భారీ స్వాగతాన్ని తొలిసారి చూస్తున్నాం. ఎంతో గొప్ప అనుభూతి కలిగిస్తోంది’ అని రేస్‌వాకర్‌ కేటీ ఇర్ఫాన్‌ తెలిపాడు.

టోక్యో ఒలింపిక్స్‌లో మన అథ్లెట ప్రతిభ దేశ క్రీడా సత్తాకు నిదర్శనంగా క్రీడల మంత్రి అనురాగ్‌ ఠాకూర్‌ అభివర్ణించారు. విశ్వక్రీడల్లో పతకాలు సాధించిన అథ్లెట్లను సాయంత్రం ఇక్కడ ఘనంగా సన్మానించారు. ఈ సందర్భంగా అనురాగ్‌ ప్రసంగిస్తూ.. ‘టోక్యో గేమ్స్‌ భారత క్రీడా చరిత్రలో ఎన్నో మైలురాళ్లకు వేదికైంది. ఒలింపిక్స్‌లో మన విజయం నయా భారత్‌ క్రీడా రంగంలోనూ ఆధిపత్యం చూపగలదని నిరూపించింది’ అని ఆయన అన్నారు.